Чинот на масовно прислушување претставува прекршување на човековите права од највисок степен и апсолутна злоупотреба на можноста за следење на комуникациите, со што се загрозува владеењето на правото во државата, наведува Хелсиншкиот комитет во својот месечен извештај кој освен прислушувањето, меѓу другото се осврнува и на Студентскиот и Професорскиот пленум и измените во законот за хонорарци.
– Имено, со неовластеното прислушување се прекршуваат член 18 од Уставот на РМ, според кој се гарантира сигурноста и тајноста на личните податоци, член 25 од Уставот на РМ според кој на секој граѓанин му се гарантира почитување и заштита на приватноста на неговиот личен и семеен живот на достоинството и угледот, се вели во извештајот на Хелсиншкиот комитет.
Дополнително, забележува ХК, од содржината на објавените разговори е очигледна злоупотребата на службената положба и овластување од страна на државните функционери, особено во делот на изборниот процес, каде постојат индиции за злоупотреба на целиот систем и масовно прекршување на избирачкото право на граѓаните, кое согласно член 22 од Уставот треба да се остварува на слободни избори со тајно гласање.
Во однос на истрајноста на Студентскиот пленум со поддршка од Професорскиот и прогласувањето на Автономна зона низ факултетите, Хелсиншкиот комитет забележува дека преку ваквиот начин на практикување директна-демократија во рамките на Универзитетот и пред се’, одбрана на автономијата на високообразовните институции, Пленумот покажал дека младите поседуваат политичка зрелост да се вклучат во процесите на носење одлуки од јавен интерес.
Во однос на плаќањето придонеси на хонорари, Хелсиншкиот комитет забележува дека граѓанската иницијатива против плаќање придонеси на хонорари составена од претставници на независни синдикати во т.н. Синдикална повелба, граѓански организации и индивидуалци, го искористија правото на пристап до информации од јавен карактер и поднесе 134 прашалници со различен број на прашања до Министерството за труд и социјална политика поради нејаснотиите поврзани со изгласаните измени за плаќање придонеси на хонорарите.
– Граѓаните инсистираат дека измените воопшто не ги отсликуваат ниту ги зеле предвид различните категории на хонорари кои граѓаните ги земаат за својот труд, ниту овозможуваат погодна здравствена и социјална заштита за новите даночни обврски, се дополнува во извештајот на Хелсиншки.
Сепак, до денот на поднесување на овој извештај, граѓанската иницијатива како и нивните претставници не добија одговор на поднесените барања за информации иако согласно Законот за пристап до информации од јавен карактер, имателот на информацијата е должен да одговори во рок од 30 дена.
– Покрај поднесените барања за информации, беше оддржан втор протест за целосно повлекување/укинување на измените на кој што се обратија различни засегнати категории на граѓани меѓу кои културните работници, глумците и претставници на синдикатите и невладините организации. Имено, извршната власт како подносител на законските измени останува индеферентна на барањата, а граѓаните не можат да се снајдат со новите бирократски измени кои дополнително го оневозможуваат лесниот пристап до права кои наводно и согласно објаснувањето на подносителот треба да обезбеди социјална и здравствена сигурност.
Комитетот го констатира обратниот ефект, односно дополнителни обврски само го отежнуваат процесот на плаќање данок, ги изложуваат хонорарите на зголемени трошоци и обврски за кои извршните власти не можат да ја дефинираат потребата или пак одговорат на контроверзни прашања во врска со изгласаните измени.