Холандија и Европската комисија се загрижени за македонската политичка криза и нејзиното продлабочување и бараат целосно повлекување на аболицијата.
Холандија, актуелен претседавач со ЕУ, преку соопштение ги испрати впечатоците на генералниот директор за европска соработка на холандското министерство за надворешни работи Роберт де Хроут, претставник на ниво на заменик-министер за надворешни работи.
За де Хроут, во Македонија “сегашната ситуација е разединувачка и неодржлива и која може да се подобри единствено преку инклузивен процес заснован на транспарентност и одговорност од сите чинители. Сите страни треба да бидат вклучени во дефинирање и спроведување на реформска агенда заснована на Договорот од Пржино”.
Холандија бара “одговорност и почитување на владеењето на правото од страна на сите, што истовремено подразбира активна поддршка од сите вклучени страни за непречено функционирање на Специјалното јавно обвинителство. Во оваа насока, одлуката за помилување донесена од Претседателот Ѓорге Иванов треба да биде повлечена сеопфатно и без дискриминација, со цел да се избегне вкоренување на впечатокот за неказнивост. Истовремено, учеството на лицата кои се под истрага на Специјалното јавно обвинителство во привремената Влада или било која друга политичка функција не придонесува кон враќање на довербата на граѓаните”.
Холандија подвлекува дека “ќе продолжи да го следи развојот на настаните во Македонија, кои се од клучна важност со цел да се врати земјата назад на патот кон Евро-Атлантска интеграција”.
Истата порака стаса и од Брисел:
“Партиите мора итно да се справат со сериозниот проблем – помилувањето кое претседателот Иванов го даде на бројни функционери. По вчерашната одлука на Парламентот, очекуваме помилувањето од 12 април неодложно да биде поништено за да се зачуваат принципите на одговорност, да се спротивстават на сериозната загриженост поради неказнивоста и да се избегне селективната правда. Еден од фундаменталните демократски принципи е сите граѓани да бидат еднакви пред законот”, рече портпаролката на ЕК, Маја Коцијанчич.