Холандската држава е цивилно одговорна за смртта на над 300 муслимани мажи и машки деца во Сребреница за време на војната во Босна во 1995 година. Оваа одлука денес ја донесе холандски суд подвлекувајќи дека Cините шлемови на холандскиот контингент “Дачбат” не ги заштитиле овие лица.
“Државата е одговорна за загубата која ја претрпеа блиските на луѓето кои беа депортирани од страна на босанските Срби од бараките на Дачбат во базата Поточари во текот на попладнето на 13 јули 1995 година”, изјави судијката Лариса Елвин.
“Во текот на попладнето на 13 јули Дачбат не требало да ги пушти луѓето да заминат од бараките”, рече судијката додавајќи дека Холанѓаните требало да знаат дека овие луѓе можат да бидат жртви на геноцидот: “Може да се тврди со доволно сигурност дека овие луѓе ќе останеле живо доколку Дачбат им дозволел да останат на тоа место”, рече таа.
Сепак, судиите не ја поддржаа жалбата на мајките на жртвите во остатокот од нивните тврдења. Иако холандските војници требало веднаш да предупредат дека се работи за геноцид, сепак државата Холандија не може да биде одговорна бидејќи таква акција барала директна интервенција на НАТО. Што значи дека, според судиите, Холандија не можела да го спречи геноцидот.
Многумина од блиските на жртвите на геноцидот се разочарани од пресудата бидејќи таа се однесува на 300 жртви а не на 7.000 колку што биле убиени. Практично тоа значи дека блиските на многу жртви ќе останат без отштета.
Во еден друг случај Холандија беше прогласена за виновна за смртта на тројца муслимани кои биле избркани од воената база на холандските Cини шлемови. Со тоа Холандија е првата држава која се прогласува за виновна за делата на нејзините војници кои оперирал во рамките на Обединетите Нации. Блиските на жртвите добиле отштета во 20.000 евра за секоја од нив.
Сребреница беше ставена под заштита на ОН кога ја презедоа силите на босанските Срби во јули 1995 година. Под водство на Ратко Младиќ беа убиени 8.000 мажи и машки деца.
Холандските војници кои биле во близина во една база со 5.000 муслимани од блиските села, пред се жени и деца, не покажале отпор на геноцидот.
После геноцидот на Евреите во Втората светска војна, овој од Сребреница е најстрашниот во Европа.