Холандија го предупредила премиерот Никола Груевски, дека на следниот самит на НАТО во Варшава во 2016 година, поканата за членство во НАТО за Македонија би требало да се преиспита доколку земјата не се придржува на демократските процеси.
Ова се случувало на ручекот во средата (11 март) помеѓу амбасадорите шест земји членки на НАТО и премиерот и неговата делегација, веднаш по средбата која Груевски ја имаше со генералниот секретар на Алијансата.
Амбасадорката на Холандија на ручекот се запрашала дали не треба да се преиспита поканата за Македонија поради нефункционалната правна држава, зависноста на судството од власта и недостигот на слобода за медиумите. Другите амбасадори не се произнеле на таа тема но познато е дека Холандија не е единствената земја која веќе одамна се прашува дали поканата за НАТО и препораката за преговори со ЕУ се уште имаат некое значење за македонските власти.
Според оваа реакција на холандската преставничка, очигледно е дека прашањето за поканата за НАТО се отвара. Овие земји се сериозно загрижени за нефункционалната демократија во Македонија. Особено оние кои имаат свои амбасади во Скопје и кои од ден на ден ја набљудуваат ситуацијата и се секој ден соочени со потези кои не и соодветствуваат на една демократија.
Овие прашања, барем во ЕУ, не се ништо ново. Веќе три години, пред секој извештај на ЕК, многу земји членки се колебаат околу тоа дали да ја поддржат препораката. НАТО досега се држеше настрана преокупиран со важни воено-политички прашања во Европа но и во светот. И повторуваше дека проблем за членство е само нерешниот спор со името.
Во една од своите последни изјави, на 4 март во Брисел, комесарот за проширување Јоханес Хан подвлече дека за да може во Македонија «да се задржи европската перспектива навистина е неопходно проблемите да се решат во земјата и да се вратите назад на адекватните меѓународни и европски стандарди».
Накусо, Хан предупреди дека Македонија ќе ја загуби препораката за преговори за членство доколку не успее демократски да ја реши оваа криза.
Уште една таква изјава дојде многу порано, во 2011 година, од екс-комесарот за проширување Штефан Филе кој изјави «Со моменталниот недостаток на реформи и половичниот пристап во имплементацијата, властите не треба да земаат здраво за готово дека и следната година ќе ја има препораката како оваа година, дури и да се реши прашањето за името».
Очигледно е дека евро-атлантската чаша на трпение почнува да се прелева.