„Морам да кажам дека длабоко жалам што актуелната политичка ситуација ризикува да го загрози понатамошниот прогрес“, изјави пред заминувањето од Скопје известувачот за Македонија во Европскиот Парламент, Ричард Ховит.
-Ќе речам дека перцепцијата за тоа што се случи на 24-ти декември е дека се става под знак прашалник демократскиот кредибилитет на државата и дека Европскиот Парламент не верува во бојкотирања на избори во оваа или во било која друга земја, нагласи тој.
– Не ни претендирав дека би можел или дека воопшто ќе најдам решение оваа недела. Тоа на крајот на краиштата е одговорност на политичарите на оваа земја, рече Ховит.
Ховит ги остава политичките партии во земјава сами да најдат решение за политичката криза што значи дека и евроинтегративниот процес, односно добивањето датум за преговори е во нивни раце.
– Верувам дека историската можност за земјата се уште постои на Европскиот совет во јуни, но она што ќе се случува овде во наредните неколку денови може да ги детерминира случувањата во Брисел во следните неколку години, порача Ричард Ховит.
Мојата порака до Владата на оваа земја е дека таа е Владата и дека има одговорност да ја реши оваа политичка криза заедно со секоја од другите политички партии што се вклучени, посочи британскиот европарламентарец.
– Нема да дадам временска рамка за решавање на политичкиот спор во земјата. Таа временска рамка беше вчера. Тоа треба да се реши веднаш оти и нанесува штета на земјата, ги загрозува нејзините перспективи и единствено што можам да кажам како пријател и човек што ја сака оваа земја и сака таа да има европска иднина е дека оваа криза мора да се реши, порача известувачот Ричард Ховит.