НВО Инфоцентарот и Младинскиот образовен форум (МОФ) во 12:00 часот, во фоајето на Младинскиот културен центар (МКЦ), во Скопје, ќе организираат завршен мултимедијален настан на проектот „Млади промотори на слободата на изразување“.
На настанот ќе бидат претставени сите кампањи и мултимедијални содржини (младински локални кампањи, фотографии, репортажни филмови, радио прилози, постери и есеи), кои четириесетина млади активисти од цела Македонија, ги реализираа и ги подготвија, а кои се однесуваат на слободата на изразување, борбата против говорот на омраза и заштитата на човековите права.
Во рамките на овој мултимедијален настан ќе биде организирана и дебата насловена како:
“Храброст или страв – што е посилно во борбата за слободно изразување?”
Панелистите: Суад Мисини, граѓански активист и аналитичар; Петрит Сарачини, активист и експерт за медиуми; Љупчо Бубо Каров, К-15, Кристина Леловац, актерка и Марјан Забрчанец, МОФ, ќе зборуваат за (не)почитувањето на граѓанските, политичките, медиумските и младинските слободи, но и за тоа колку уметноста, творештвото, хуморот и сатирата се слободни во Македонија. Модератор на дискусијата ќе биде Билјана Бејкова од НВО Инфоцентарот.
НВО Инфоцентарот и МОФ, преку проектот „Млади промотори на слободата на изразување“, финансиран од Европската унија, преку Европскиот инструмент за демократија и човекови права (ЕИДХР), сакаат да ја поттикнат креативноста на младите луѓе, но уште повеќе, да ги охрабрат и да ги обучат младите да бидат активни, гласни и видливи во битката за слободата на изразување и заштита на човековите права.