Како што беше објавено денеска во резимето на првата фаза од швајцарската програма „Зајакнување на општинските совети“ која во изминатите пет години се спроведе во 24 општини во државата, повеќе од 420 општински советници минале низ 100 обуки за да ги подобрат своите знаења и вештини. Истовремено, сите 1.347 советници во државата добиле можност за дигитално вмрежување, учење од далечина и сертифицирање преку наменска веб платформа изработена во рамки на програмата.
„Би сакал да ја зголемиме ефективноста и автономноста на општинските совети за поуспешно извршување на нашите задачи и улоги. Затоа, треба да развиеме нови вештини, да ги унапредиме нашите знаења од областа на локалната самоуправа, да разменуваме искуства со цел поефективно претставување на граѓанските приоритети и надзор на работата на општините“, рече Трајко Славески, претседател на Комитетот на совети при ЗЕЛС.
Објавено е и дека во сите 24 општини биле имплементирани 33 други проекти, избрани директно од страна на локалните жители. На вкупно 126 форумски сесии учествувале над 8.800 граѓани. Резултатот од овие проекти е подобри услови во 11 градинки и училишта, реконструирана патна инфраструктура во три општини, подобар квалитет на давањето услуги на граѓаните во пет општини, пет нови спортски и рекреативни центри, нови ИТ алатки и опрема во две училишта, и четири проекти со кои се подобрија условите за ранливите групи граѓани и нови младински центри во три општини.
„Главната придобивка на програмата е што помогна да се подобри квалитетот на живот на граѓаните но во исто време воспостави алатки и пракси кои го зајакнуваат капацитетот и на советниците и на општинската администрација“, вели амбасадорката на Швајцарија во Северна Македонија, Вероник Улман.
Дел од проектот е и снабдување на општините со противпожарни возила чиј недостиг стана очигледен при пожарите што минатото лето ја зафатија земјава.
Во функција на подобрување на транспарентноста на општините, во 18 општински совети се инсталирала и опрема за пренос во живо на седниците на советот, а во останатите шест општини се поставени е-киосци за извршување на локалните услуги, веб апликации за директна комуникација помеѓу граѓаните и советници или за вклучување на граѓаните во процесот на подготовка на општинскиот буџет. Дополнително, изработена е и веб платформа за едноставен и разбирлив приказ на реализацијата на општинските буџети, која во моментов ја користат 40 општини и Градот Скопје.
Вкупниот буџет на програмата „Зајакнување на општинските совети“ изнесува 3,5 милиони швајцарски франци.
Швајцарија, која е меѓу најголемите билатерални партнери на Северна Македонија, ги помага општините и со експертиза, финансирање и друг конструктивен ангажман. (Р.Н.)