Три недели по почетокот на офанзивата во Ирак и Сирија, радикалната сунитска милиција ИДИЛ (Исламска држава во Ирак и Левант) во аудио порака на Твитер соопшти дека прогласува калифат на териториите под нејзина контрола.
Калифатот, исламска форма на владеење исчезната пред речиси сто години, ќе се протега од регионот Алепо на северот на Сирија се‘ до регионот Дијала, на истокот на Ирак, соопшти портпаролот на ИДИЛ, Абу Мохамед ал-Аднани. Во пораката објавена на Твитер уште се вели дека калиф ќе биде лидерот на ИДИЛ, Аби Бакр ал-Багдади и дека сите муслимани мора да му се заколнат на верност.
Во исламскиот свет, калифот, кој се смета за следбеник на пророкот Мухамед, се нарекува „емир на верниците“. Калифатот, исламска форма на владеење каде световното и духовното водство е во исти раце, својот процут го имаше во периодот од 7. до 16. век. Последниот калифат беше укинат во 1924 година од страна на турската влада, по распадот на Османлиското царство.
Заклучокот за создавање калифат, според ал-Аднани, е донесен на заседание на шурата (советот, н.з.) на ИДИЛ. Според негови наводи, групата во иднина нема веќе да се нарекува ИДИЛ, туку само „Исламска држава“. Ал Аднани во пораката нагласува и дека калифатот е „сон на секој муслиман“ и „желба на секој џихадист“.
ИДИЛ беше близок на терористичката мрежа Ал Каеда, меѓутоа пролетва дојде до прекин на односите. Според проценки на експертите, сега двете организации се борат за лидерско место во џихадистичкото движење.