Институтот за демократија „Социетас Цивилис“ – Скопје (ИДСЦС) повикува на следните лидерски средби организирани за преговори за излез од политичката криза, покрај претставниците на меѓународната заедница, како набљудувачи да бидат вклучени и граѓански организации и движења.
ИДСЦС констатира дека улогата на граѓаните е важна во осигурување дека потребните реформи за демократизација на општеството ќе бидат одржливи и долготрајни.
„Сметаме дека граѓаните се засегната страна во процесот на демократска трансформација и мора да бидат вклучени. Потсетуваме дека суверенитетот во Република Македонија произлегува и им припаѓа на граѓаните“, велат од ИДСЦС.
Од таму порачуваат дека политичките партии кои во наредниот период ќе треба да ја градат Републиката и да спроведат длабоки реформи, мора да ја прифатат значајната улога која граѓаните, нивните движења и граѓанските организации ја имаат во истиот тој процес.
„Граѓанските организации можат да помогнат со совети и со набљудување на процесот на реформите кои што претстојат.
Предлагаме на лидерските средби, како и идните форми на разрешување на политичката криза, да присуствуваат двајца претставници на граѓанските организации и граѓанските движења.
Предлагаме, овие претставници да ротираат од оние кои се занимаваат со демократизација, добро управување и човекови права. Причината за ваквиот избор е бидејќи во овие сектори треба да се направат првите клучни чекори и најдлабоките реформи. Ги повикуваме организациите кои се заинтересирани да учествуваат во овој процес да не контактираат, а од листата на пријавени ИДСЦС ќе состави редослед по случаен избор и ќе го објави и достави до повиканите политички лидери и амбасадори.
Се надеваме дека политичките лидери ќе разберат дека уште од овој момент граѓаните мора да бидат вклучени во разрешување на кризата. Граѓаните очекуваат одговорност, отчетност и вклучување“, се вели во соопштението од ИДСЦС.