Односите на Балканот преку дијалог и компромис влегуваат во интеграциски колосек. Хрватска го реши спорот со Словенија, а кога сите веруваа дека тоа е невозможна мисија, и Србија постигна договор со Косово. Македонија е далеку од оваа приказна. Евроатлантските интеграции и‘ се условени со решавање на спорот за името со Грција, а врз тие шанси фрла сенка и непотпишаниот договор за добрососедство со Бугарија.
Има ли Македонија капацитет и лидерство подготвено за крупни одлуки во билатералните спорови? Ставовите на политичарите и дипломатите се поделени по ова прашање, анализа на Дојче Веле.
Претседателот на првото повеќепартиско Собрание, Стојан Андов, вели дека Македонија подолго време нема лидерство, а особено сега – лута.
„Од времето кога е донесена Привремената спогодба, немаме направено ни чекор напред. Немаме лидерство кое е способно да ги примени европските концепти ниту во уредувањето на односите со соседите, ниту лидерство кое и внатре може да ги обедини граѓаните во пропулзивна политика кон напредок. Ако на тоа се додадат и внатрешните слабости – конфузијата во меѓуетничките односи и слабоста на демократските институции, сите тие елементи укажуваат дека нашето државно раководство нема капацитет да се носи со предизвиците со кои се соочува земјата“, категоричен е Андов.
Амбасадорот Ристо Никовски, пак, смета дека името на државата е само покритие за да се прекрсти народот.
Поранешниот шеф на македонската дипломатија, Денко Малески, вели дека Македонија ја пропушти можноста како млада и храбра нација да го искористи европскиот дискурс и да излезе од балканската кал, па сега трпи удари од сите страни.
„Најстрашно е кога се обидуваш да демонстрираш водство, а нема кој да те следи. Се договараш за спроведување одреден крупен чекор. Одиме ли? Одиме! Потоа се вртиш и гледаш дека зад тебе нема никој. Политичката структура во почетните години по осамостојувањето не успеа да произведе решенија, но не успеаја и оние кои продолжија потоа. Играа на картата ‘времето работи за нас’. Јас велам ‘времето работи за оние кои работат’“, вели Малески.