„Жените што свират инструменти сѐ уште се соочуваат со сексистички коментари од своите машки колеги. И тешко успеваат да се пробијат и работат петпати повеќе од мажите за да успеат да се изборат за соодветен статус. Прифатени се само инструменталистките што се рекламираат на поинаков начин и играат на картата на сексуалноста“.
Го пренесува Нова Македонија тврдењето на познатата новинарка на Би-би-си, Џени Мареј, која ја води радиоемисијата „Женски час“.
Според неа, атрактивните инструменталистки, виолинистката Никола Бенедети и трубачката Алисон Балсом, се добро прифатени од своите машки колеги само поради фактот дека се рекламираат на специфичен начин. Преостанатите, како што вели, кои не се водат од принципот „сексот продава“, се оставени сами да се борат за рамноправност во оркестрите.
Половата дискриминација, која е доста присутна во светот на класичната музика денес, кај нас не постои, тврди Маја Чаначевиќ, директорка на Македонската филхармонија.
„Иако секогаш сакаме западноевропските земји да ни бидат пример за добрите нешта, понекогаш се случува за одредени работи нашата средина да биде понапредна токму од овие земји. Ако зборуваме за половата дискриминација, таа кај нас, барем во Македонска филхармонија, не постои. Некој може да каже дека мојот став е субјективен бидејќи и јас сум жена, но јас и како личност не сум конзервативна ниту, пак, сметам дека поради одредена припадност или различност луѓето треба да бидат дискриминирани. За мене, како професионалец, важно е дали музичарот е добар или не и дали е способен професионално да ја извршува работата“, вели Чаначевиќ за Нова Македонија Нова Македонија.