Државјанството на европските земји не е за продавање. Ова е пораката која од Стразбург минатата недела ја испрати Европскиот парламент (ЕП) усвојувајќи резолуција, која не е законски документ, со која се осудува намерата на Малта, од 1 февруари, да го продава своето државјанство за сума од 650.000 евра за 1.800 лица кои ќе се пријават.
Малта, да потсетиме, има 400.000 жители.
Како и ЕП така и Европската комисија (ЕК) се противници на овие планови на Малта. “Европското државјанство не може да носи етикета со цена”, изјави во Стразбург Вивиан Рединг, комесар за правда и фундаментални слободи. Таа потсети дека поседување на европски пасош дава право на слободно движење за работната рака и гласање на локални и европски избори во сите земји членки.
Во ЕУ не постои законски акт која ја регулира оваа област па проценката за тоа како се добива државјанство е оставено на секоја земја членка доколку постои “врска помеѓу лицето кое бара државјанство и земјата”.
Но, според планот на Малта, за да се купи државјанството не треба дури ни да се има документи за престој. Потребни се само пари.
Оттука некои од пратениците на дебатата вчера во Стразбург забележаа дека за “сите гангстери од Русија или Кина и олигарси” ќе можат да си купат пасош и да перат валкани пари. Според пратеничката Мари-Кристин Вержиа од Обединетата левица, ова го потврдува парадоксот на ЕУ која се отвора за дебели џебови а се затвора за имигрантите кои се во неволја.
Демо-христијаните од ЕП побараа да се стави крај на овој закон во Малта а социјалистите, кои се на власт во Малта, побараа ЕК да реагира во корист на вредностите на ЕУ.
Либералите од своја страна побараа од ЕК да донесе јасен текст и да не се ограничува само на пораки.
Малтешките десничари пак рекоа дека се борат против проектот и се загрижени за лошиот имиџ што за Малта го дава овој проект. Тие посакаа нивната влада да ги чуе пораките на пратениците од Стразбург.
Малтешките социјалисти го бранеа проектот: “Ова е напад врз суверенитетот на Малта која повеќе не е колонија. Оние што се обидуваат да ја понижат Малта од политички причини треба да се засрамат од себе си”, рече пратеничката Марлен Мици.
Овој став го поддржа Грција, претседавач на ЕУ, која смета дека “земјите членки треба да имаат свои правила за државјанството. Нема хармонизација во ЕУ во оваа област”.
ЕП побара дебата на оваа тема која ќе ги ориентира земјите членки во оваа област. Имено, во ЕУ и други држави имаат еден вид сомнително однесување во врска со државјанството. Така Австрија, Португалија, Кипар или Белгија имаат необични закони. Во Белгија е можно да се добие државјанство по неколку години легален престој во државата за кое се бара голема сума пари. Така некои богаташи од соседните земји добиваат државјанство и се доселуваат во Белгија каде што плаќаат помалку даноци.
И покрај јасните пораки на ЕП пратениците не веруваат дека малтешката влада, ниту било која друга, ќе ги послуша. Областа останува да биде регулирана од националното законодавство и според интересите на секоја земја.