На 26 март Барак Обама доаѓа во Белгија. Датумот ви се чини далеку? Но не и за безбедносните служби на државата кои се веќе во интензивна акција и во преговори со тајните служби на американскиот претседател. За само 24 часа колку што Обама ќе остане во Белгија веќе се работи на анализа на сите можни ризици и се подготвува сценариото за тој ден, јавува белгискиот магазин Л Виф.
Тајните служби имаат задача да проверат 320 км канализација, да го затворат сите влезови во канализацијата на Брисел и да ги затворат сите канти за ѓубре кои би можеле да се најдат на патот на Обама.
Air Force One на американскиот претседател ќе слета во аеродромот во Брисел и за време на слетувањето воздушниот простор ќе биде затворен исто како и кога ќе си заминува. За пречек се предвидени десетина коли помеѓу кои и една амбуланта опремена со операциона сала кои во Брисел ќе пристигнат претходно. За Обама е предвиден блиндиран Кадилак кој го носи името The Beast (Sверот) и кој не може да биде пробиен од вооружени истрели, ракети или хемиско оружје.
Жителите на Брисел кои живеат блиску до местата каде што ќе минува претседателот ќе добијат прецизни инструкции како да се движат и кои контроли ќе бидат спроведени.
Се уште не е познато колку ќе чини целата оваа еднодневна (скапа) операција но Белгија е таа што ќе треба да плати. Од Министерството за внатрешни работи велат дека ќе видат дали трошоците можат да бидат поделени со САД.
Инаку целта на посетата на Обама на Брисел се средби со европското раководство, најверојатно последни бидејќи првите луѓе на ЕУ – Баросо и Ван Ромпеј – своите мандати ги завршуваат оваа година. На овие средби се предвидени интересни теми за разговор како на пример што се случува со американското прислушкување во Европа и преговори за транс-атлантски трговски договор.