Судот во Индија на барање на индискиот регулатор СЕБИ денес ги замрзна сите сметки на тамошниот милијардер Субрата Рој, човекот кој на покана на македонската влада ќе инвестира во казина и хотели на охридското крајбрежје.
Замрзнати се сите сметки и целиот имот на фирмите од Сахара Груп, како и личните банкарски сметки и личниот имот на Субрата Рој и уште тројца од неговите директори.
Оваа акција доаѓа откако индискиот врховен суд пресуди во спорот помеѓу регулаторното тело и Сахара Груп и ја задолжи компанијата да врати 3 милијарди евра со 15 проценти камата на милиони измамени граѓани.
Судот ја задолжи компанијата на Субрата Рој да ги врати парите во рок од три месеци, а на нивно барање им биле дозволени и три рати за враќање на долгот.
Сахара Груп ја платила првата рата или само една петтина од долгот, но не и останатите две.
Индиските медиуми пишуваат дека пред десетина дена од Сахара Груп се пофалиле дека вратиле речиси се, но денешната одлука на судот го потврдила спротивното.
На сметките на фирмите засега нема ниту ниту третина од парите потребни за подмирување на долгот.
Изминатите денови во индиската јавност имаше реакции на адреса на пристрасноста на судот дека оваа одлука требала да дојде многу порано поради опасност Рој парите од фирмите да ги префрла на други фирми надвор од Индија.
Субрата Рој во Македонија дојде на покана на македонската влада. Најави инвестиција од 100 милиони евра.
Треба да гради хотели и казина на брегот на охридското езеро. Медиумите и тогаш пишуваа за проблемите со законот на контроверзниот милијардер во матичната земја.
Министерот за финансии, Зоран Ставревски, изјави дека не е загрижен поради спорот на Субрата Рој во Индија бидејќи тоа било работа на друга држава, а за него било важно да се реализира она што е договорено тука.