УЈП да почне да ги истражува финансирањата на партиите, а владините кампањи да одат само на јавниот сервис – ова се дел од препораките како да се спречи изборен поткуп и злоупотреба на државните ресурси за партиски цели.
Финансиите на партиите и нивните изборни кампањи остануваат црно дувло за коруптивни шеми и сериозни финансиски малверзации . Од изборен поткуп преку вработувања, тендери и владини кампањи за време на предизборието, па се до проблематичните партиски донации, па дури и илегални пари – проблемите се чини се продлабочуваат од избори до избори.
Ова беа заклучоците од трибината во организација на Транспарентност Интернешнл Македонија на тема финансирањето на изборната кампања пред локалните избори, кој не дојде ниту еден претставник од Антикорупциската комисија, Државната изборна комисија и Заводот за ревизија, како и од владејачката ВМРО ДПМНЕ.
Медиумите и физичките лица кои се јавуваат како донатори на партиите остануваат едни од најпроблематичните илустрации за корупцијата во изборите.
“Во Македонија на претходните избори во извештајот на владејачката партија, но и другите, немате фирми кои дале пари за партии, туки само физички лица. Има такви кои не знаат дека донирале, такви кои не се сеќаваат дека донирале. И сето ова не се теми за институциите”, вели уредникот на Фокус, Јадранка Костова.
“Во дв дена сите петстотини донатори на ВМРО ДПМНЕ отишле во банка и сите донирале иста сума пари. И сите од администрација”, констатира претставникот на ЛП, Кире Бузлиев.
Претседателката на Транспарентност, Слаѓана Тасева, вели дека време е управата за јавни приходи да почне да се занимава со овој проблем, со оглед на тоа дека во земјие од регионот тоа веќе се прави.
“Во Србија во моментов нивното УЈП на големо ги испитува сите физички лица кои донирале пари во партијата за да видат дали се реални донациите и од каде им се парите. Кај нас УЈП воопшто не се бави со таа проблематика, а тие се најповикани, не само Антикорупциската или ДИК”, вели Тасева.
Претставници на опозициските партии НСДП и НДП на Руфи Османи обвинија и за проток на нелегални пари во финансирањето на изборите. Од НСДП тврдатдека во град во Источна Македонија, македонски пратеник од власта купувал гласачи со пари во торба на локалните избори од 2009 година, а претставникот на НДП обвини дека ДУИ го правела истото во Чаир и Арачиново.
Една од препораките која произлезе од панел дискусијата е со закон да се забрани владата да се рекламира во приватните медиуми, а нејзините кампањи да одат само на јавниот сервис, со што би се спречил поткупот на медиуми на избори со државни пари.
Антикорупциската комисија, Државниот завод за ревизија и Државната изборна комисија, иако поканети, не дојдоа на дискусијата на финансирањето на партиите.
Во видеото погледнете дел од коментарите на учесниците на трибината.