Квантификацијата(броење на бактериите) не била од пресудно значење за докажување на листерија кога е докажан ист генотип и кај болните и во примерокот од производот, тврдат во Комисијата за заразни болести.
Со ова надлежните потврдуваат дека во спорниот сецканиот свински врат на Екстра меин земен од маркет во Гевгелија има листерија.
На овој начин Комисијата за заразни болести го демантира тврдењето на Факултетот за ветеринарна медицина дека во производите на оваа компанија ја нема опасната бактерија, исто како што демантираат дека е направена супер-анализа во лабораторијата на овој Факултетот.
-Мала е улогата на квантификацијата кога има ист генетски профил. Супер-анализата не е завршена бидејќи примерокот што е испитуван на Факултетот за ветеринарна медицина не е земен од исто место, во исто време од спорниот свински врат , туку од свинскиот врат кој што е повлечен од продажба, изјави Звонко Миленковиќ, претседател на Комисијата за заразни болести на денешната прес конференција.
Миленковиќ потенцираше дека соодветниот примерок се чува запечатен во Центарот за јавно здравје во Велес и дека во моментот интензивно бараат релевантна лабораторија во странство каде што ќе го пратат примерокот на испитување.
На прашање на НОВА зошто се вршат инспекциски контроли во месната индустрија, кога се знае дека листерија може да се добие и од овошје и зеленчук, како и од друга храна, Миленковиќ со одговор:
-Тоа е ризична храна. Но, испитувања се правени и во други правци според изјавите на пациентите кои што кажуваат што јаделе. Она што е сигурно, е дека во еден производ е најдена листерија, рече Миленковиќ, алудирајќи на спорниот свински врат на Екстра меин.
Миленковиќ соопшти дека е формирана работна група во Комисијата која секојдневно ќе ја следи состојбата со листеријата.
Од оваа опасна бактерија за нешто повеќе од еден месец починаа четири лица, меѓу нив и едно новороденче, а шест заболеа. Изворот на заразата се уште се бара бидејќи од спорниот свински врат, како што посочија во изминатите денови, јаделе само двајца од заразените.