Опозициската ВМРО-ДПМНЕ поднесе иницијатива за интерпелација за министерот за надворешни работи Никола Димитров.
Како што соопшти пратеникот до ВМРО-ДПМНЕ, Антонијо Милошоски на прес-конференција во Собранието, клучните причини за ваквото барање се: Договорот со Бугарија, тоа што Александар Николовски од ВМРО ДПМНЕ не е именуван за амбасадор во Брисел и немањето јасен став за прашањето за бегалците.
СДСМ смета дека со поднесената интерпелација за министерот за надворешни работи Никола Димитров, ВМРО-ДПМНЕ останува заробена во минатото и политиките на поделби, изолација, раздор и конфликти со што продолжува да работи на штета на државните и интересите на граѓаните.
Во соопштението се наведува дека се залудни сите обиди на ВМРО-ДПМНЕ преку неиздржани интерпелации да се обидуваат да ја држат Македонија во изолација и да ги кочат реформите што носат добро за сите граѓани.
Претходно опозициската партија поднесе иницијатива за интерпелација за министрите за земјоделство Љупчо Николовски поради неажурност во справување со пожарите и за труд и социјална политика Мила Царовска поради стратегијата за бегалците и мигрантите.