Уличното осветлување пред полициската станица Пролет во скопска Кисела Вода е исклучено, додека пред станицата во моментов граѓани на мирен собир бараат ослободување на приведениот активист Павле Богоевски. Како што јавува репортерката на НОВА Сашка Цветковска, осветлувањето е исклучено само на улицата пред станицата.
Граѓаните со свирежи и скандирања бараат итно ослободување на активистот Богоевски, кој беше уапсен пред околу еден час за време на герила-акција на Шарената револуција на Камениот мост.
Портпаролката на СВР Скопје Лиза Бендевска вели дека за апсењето, медиумите може да и се обратат утре, бидејќи како што рече, сега било доцна. Засега, сведоци на настанот, меѓу кои и активистот Замир Мехмети за НОВА велат дека Шарената Револуција се обиделе да направат мирна герила акција во која ќе спуштат платно од Камениот мост, за време на партиската прослава на ВМРО-ДПМНЕ, но полицијата ги спречила и без никакво предупредување го привела Богоевски.
„Ништо не нарушивме ниту направивме нешто и рипнаа почнаа да не маваа, имаше мал инцидент од неколку секунди во кој не удрија, и го однесоа Павле најверојатно во полициската станица „Пролет“, изјави Мехмети за НОВА.