Денеска во 19 часот истекува рокот во кој Државната изборна комисија денеска треба да ги разгледа над 400 приговори пристигнати од партиите за прекршување на изборниот процес.
До синоќа одбиени се 27 приговори на СДСМ за Кисела Вода и Штип, а делумно се уважува приговорот за Демир Капија.
Претходно ДИК ги одби 38-те приговори на ДОМ и едниот на Демократска партија на Турците, за нерегуларности во Пласница. За приговор на Народното движење за Македонија, ДИК ќе одлучува дополнително.
Седницата на Државната изборна комисија вчера помина во три часовни препирки околу тоа како да се расправа по приговорите за изборни нерегуларности. Судирот настана околу тоа дали да се одлучува по партии или по ред по саатници како што и пристигнувале приговорите
ДИК е должна да донесе одлука во рок од 48 часа. Против одлуката на ДИК, подносителот на приговорот може да поднесе тужба до Управниот суд во рок од 48 часа од приемот на решението. Управниот суд е должен да донесе одлука во рок од 48 часа по приемот на тужбата.
Одлуките по приговор и тужбата со самото донесување се објавуваат на интернет страницата на Управниот суд и на ДИК.
Секој подносител на листа на кандидати, при поднесување на приговор до ДИК задолжително доставува и официјална интернет адреса т.е. електронско сандаче заради доставување на одлуката на ДИК.
Рокот за поднесување на тужба до Управниот суд започнува да тече по истекот на пет часа од доставувањето на одлуката на ДИК во електронското сандаче.