Постапувајќи по кривичната пријава, надлежниот обвинител донесе Наредба за спроведување на истражна постапка против четворица осомничени за сторено кривично дело Неовластено производство и пуштање во промет на наркотични дроги, психотропни супстанции и прекурсори предвидено и казниво по член 215 став 3 од Кривичниот законик.
Ценејќи дека се исполнети условите за определување на мерката притвор, во текот на денот надлежниот обвинител до судија на претходна постапка при Основниот кривичен суд – Скопје ќе поднесе предлог за определување на мерката притвор против сите лица.
И од МВР претходно информираа дека на 13.09.2021 полициски службеници од Одделот за криминалистичка полиција – Сектор за недозволена трговија со дрога, оружје и опасни материи, ОВР Гостивар и ОВР Дебар спроведоа координирана акција, при што се лишени од слобода четири лица и запленети околу 20 килограми марихуана, со вредност од околу 70.000 евра, и три возила.
Полициски службеници од ОВР Дебар кај Бошков мост се обиделе да сопрат патничко моторно возило „голф“ со скопски регистерски ознаки поради сомнение дека во возилото има дрога, но возачот не застанал и се дал во бегство, а по преземени мерки и активности во близина на Скудрински мост пронајдено е возилото и приведен А.И. (32) од с. Никуштак. Во возилото се пронајдени две големи торби со 20 пакувања марихуана.