Девет лица загинаа, а едно се смета за исчезнато по невремето кое ја зафати Италија. Во невремето се уништени голем број патишта во земјата и поплавени се неколку градови и населени места.
Во невремето се повредени десетици лица, меѓу кои и неколкумина пожарникари.Училиштата и туристичките локации се затворени во неколку региони поради стравувањата за безбедноста на луѓето.
Италијанските спасувачки служби соопштија дека вчера биле регистрирани околу 7.000 инциденти, на кои одговориле околу 5.800 пожарникари.
Најлоша е ситуацијата во Венеција, каде дождовите предизвикаа поплави кои уште толку го зголемија нивото на водата, па преплавија многу од неговите познати плоштади и пешачки патеки, додека официјалните лица велат дека 75% од градот сега е под вода.
Венецијанскиот централен плоштад Свети Марко е затворен од вчера попладне, откако нивото на водата достигна до 156 см . Тоа е четврто највисоко ниво кое било досега забележано. Сепак, многу луѓе – туристи и локални жители – одлучија да му се спротивстават на невремето.
Со Венеција и поширокиот регион на Венето, сега на сила е црвен аларм, при што жителите се повикуваат да се подготват за големи проблеми во транспортот и со инфраструктурата. Портокалов аларм е за остатокот на полуостровот и за Сицилија. Метеоролозите предупредуваат дека лошото време ќе продолжи.
Бура има и во Хрватска, во областа на Савудрија исчезнаа во понеделникот попладне двајца млади луѓе кои отидоа на сурфање и покрај предупредувањата за невремето.
Според ХРТ, пронајден е жив еден од младите луѓе, хрватски државјанин, кој успеал сам да исплива на брегот. За момчето од Словенија, потрагата ќе продолжи и денеска, кога ќе дозволат временските услови.

Јадранската магистрала на делницата во Хрватска е затворена за сообраќај поради одрон на патот.
Во Шибеник се оштетени неколку автомобили, а на девет места настанале пожари поради мали експлозии на далекуводите.
Хрватското приморје и Далмација се најпогодени, а поради нискиот воздушен притисок, нивото на морето е покачено.








