Италијанската влада го одобри нацрт-законот со кој се забранува производство и употреба на лабораториска храна. Целта на овој нацрт закон е да се заштити земјоделско-прехранбената улога на почвата, рече италијанскиот министер за земјоделство.
Ако предлогот биде усвоен од парламентот, италијанската индустрија нема да може да произведува храна или добиточна храна во лабораториски услови, се вели во нацрт-законот.
„Според нас, лабораториските производи не гарантираат квалитет, благосостојба и заштита на нашата култура, нашата традиција“, рече министерот Франческо Лолобриџида.
Владата на премиерката Џорџија Мелони вети дека ќе ја заштити италијанската прехранбена индустрија од технолошките иновации кои се сметаат за штетни и го преименуваше Министерството за земјоделство во „Министерство за земјоделство и суверенитет на храната“.
Предлог-законот предвидува казни до 60.000 евра и губење на правото на јавно финансирање до три години. Фабриките каде што ќе има прекршоци може и да се затворат.
Според едно истражување, 84 отсто од Италијанците се против лабораториски произведена храна, пишува италијанскиот магазин за храна „Italia a Tavola“.
Сепак, иницијативата за забрана на храната која се одгледува во лабораторија ги налути организациите кои го поддржуваат развојот на земјоделски производи „базирани на клетки“ низ Европа, како и групите за заштита на животните.
Извор: Бриф