Највлијателното италијанско поетско списание „Поесиа“, основано во Милано во 1905 година од зачетникот на футуризмот, Филипо Маринети, објави обемен избор поезија на македонскиот поет Никола Маџиров.
Во февруарскиот 290-ти број на „Поесиа“ на првите страници од списанието објавени се 20 песни на Маџиров во превод на италијански јазик со воведен текст за неговата поезија од италијанскиот преведувач Пјеро Салабе, познат и како приредувач на антологии на современата италијанска поезија во странство.
Во својот осврт тој пишува за Маџиров како за веќе афирмиран поет и книжевен номад, кој го напушта домот за да изгради нов во поетските сеќавања, нагласувајќи дека денес ретко можат да се прочитаат такви песни – отворени и свесни за традицијата едновремено.
Поезијата на Маџиров веќе се пренесува и коментира по италијанските поетски веб-страници и блогови.
„Поесиа“ важи за едно од најважните поетски списанија во меѓународни рамки со годишен тираж од над 20.000 копии.
Инаку, Никола Маџиров е во престој во Брисел до крајот на месецот, откако беше избран за автор-гостин на една од најзначајните европски книжевни резиденции „Паса Порта“, а неодамна неговата поезија беше објавена и во најновиот број на специјализираното поетско белгиско списание „Поезие крант“.