Македонија отсекогаш верувала и во практика го применувала ставот дека дијалогот е незаменлив. Позитивниот пример за соживот, толеранција, меѓусебно разбирање и поддршка треба да се вреднува, наградува и да ги инспирира другите, порача денеска македонскиот претседател Ѓорге Иванов, на отворањето на 5.Глобален форум на Алијансата на цивилизациите на ОН, што се одржува во Виена.
Верувам, истакна Иванов, дека е време да ја прошириме перцепцијата за светот како поле за дијалог меѓу цивилизациите, кој е во основата на културниот натпревар меѓу народите. Религиската толеранција, посочи, е вредност што треба да се учи, гради и надградува, а промените со кои се сочуваат религиите треба да се искористат за унапредување на дијалогот. – Ако во минатото религиите беа територијални, денес, во време на нови технологии и интернет, тие се нетериторијални и тоа е и предизвик, но и можност за унапредување на комуникацијата и дијалогот, наведе шефот на македонската држава.
Антитеза на религиската нетолеранција, нагласи, е религискиот плурализам, сфатен не само како поголема различност, туку и како перцепција и прифаќање на таа различност. – Религискиот плурализам е дел од начинот на живеење на луѓето, начин што не се наметнува, туку извира од реалниот живот. Кај заедниците, народите и нациите религиската толеранција е вредност што треба да се учи, гради и надградува со децении и векови, рече Иванов.
Цитирајќи ја пораката на Махатма Ганди дека гневот и нетолеранцијата се непријатели на доброто разбирање, наведе дека токму нетолеранцијата беше причина за голем дел од колективните човечки трагедии на денешницата, а кои ги има многу. – Предрасудите, исклучивоста, маргинализацијата, омразата и нетрпеливоста кон различноста водат кон трагедиите, предупреди Иванов.
Според него, соживотот, толеранцијата, меѓусебното разбирање и помагање се вредности што Македонија ги практикувала во минатото, а продолжува така и денес. Тоа е позитивен пример што треба да се вреднува, наградува, и да ги инспирира другите, порача македонскиот претседател.
Традиционалната балканска и македонска логика на меѓурелигиски и меѓуетнички соживот ги опиша со симболиката на т.н комшиски капиџик, врата на ѕидот меѓу две соседни куќи, што секогаш била отворена.
– Капиџикот е врата која дури и во времиња на предизвици не смеела да биде затворена. Во основа на таа логика е искуството на нашето мултиетничко, мултијазично и мултирелигиско општество кое со векови овозможувало мирна коегзистенција меѓу религиите. Ваквата традиција на соживот и религиска толеранција создаде цврсти трансгенерациски пријателства меѓу луѓе од различни религии. А како резултат на тоа, Македонија е една од ретките земји во Европа каде православни христијани и муслимани го слават Бога во еден објект, под ист покрив. Тоа се места каде религиите не само што се допираат, туку и просторно и временски се преклопуваат, укажа Иванов.
Македонскиот религиски плурализам, подвлече, може да се потврди и со мисијата на Мајка Тереза, која е родена во Скопје. Во радиус не повеќе од 100 метри од нејзината родна куќа, имало католичка црква, православна црква, еврејска синагога и муслиманска џамија. – Мајка Тереза, која своето детство го минала во овој микрокосмос на религиски плурализам, стана синоним за човек кој живее во религиска отвореност и толерантност, оцени македонскиот претседател.
Македонија, како што рече, го негува и промовира моделот за мир, толеранција и интеграција преку регионални иницијативи, како што е форумот на дијалогот на цивилизаците, што годинава ќе се одржи по 10. пат, а почна на иницијатива на поранешниот претседател Борис Трајковски.
– Оваа иницијатива даде фантастични резултати за мојот регион, во време кога целиот регион излегуваше од период на изолација, нетолеранција и конфликти. Фактички и формално, она што Алијансата на цивилизациите сака да го прави на глобално ниво, Република Македонија го започна уште во 2003 година на регионално ниво. Уверени дека дијалогот е незаменлив, во мај оваа година ќе бидеме домаќини и на третата светска конференција за дијалог меѓу религиите и цивилизациите, што традиционално се одржува во Охрид, најави претседател Иванов.