ФОТО: МИА
Македонија треба да биде горда дека нејзино дете го заобиколило светот за да пружи хуманитарна помош, порачаа од римокатоличката црква за време на мисата којашто се одржа на плоштадот Македонија. Светата миса ја предводи специјалниот папски кардинал, сараевскиот надбискуп, кардиналот Винко Пулиќ.
На мисата присуствува и претседателот Ѓорѓе Иванов кој истакна дека пораката на Мајка Тереза е да го следиме патот на соживотот. Според него, нејзината канонизација била можност за таков чекор и лидерите на двете најголеми партии од македонскиот блок ја прифатиле поканата и биле на канонизацијата во Ватикан, но за жал, лидерите на двете најголеми партии од албанскиот блок не успеале да се издигнат над дневнополитичките тензии и недоразбирања.
– Гледајќи колку лесно крстот и полумесечината, црквата и џамијата ги претвораме во граничници и тврдини за маркирање и бранење на некакви си замислени територии, би нè потсетила дека верата е љубов во акција. Дека не смееме само на име да се нарекуваме верници, туку дека мора да помагаме, се додека не нè заболи. Затоа што вистинската љубов боли. Би нè охрабрила да го чуваме највредното нешто што го имаме, највредното што и таа го понесе со себе во Индија, а тоа е нашиот македонски модел на соживот и почитување и прифаќање на различноста. Затоа што само така ќе научиме да живееме заедно со сите наши најдлабоки верски, етнички и идеолошки разлики, рече Иванов.
Мајка Тереза беше прогласена за Светица на 4-ти овој месец.