Граѓаните поддржуваа различни партии, различни политички опции. Така е и на централно и на локално ниво. Но, кога станува збор за Македонија, нема ни партии, ни политички опции. Кога станува збор за Македонија, сите сме си наши, независно од етничката или религиската припадност, рече во петокот вечерта претседателот Ѓорге Иванов во Куманово барајќи го вториот мандат како кандидат на владејачката ВМРО-ДПМНЕ.
„Ќе ме препознаете по моите животни принципи: чесност, искреност и трудољубивост, на коишто опстанав и функцијата не ме промени. Сè што беше предвидено со програмата од 2009 година е исполнето”, порача претседателскиот кандидат на владејачката коалиција За подобра Македонија.
„Пред пет години и Куманово за мене даде повеќе гласови, отколку за кандидатот на опозицијата. Благодарен сум за големата поддршка и очекувам истата да се повтори. Напорно работев за да ја оправдам вашата доверба”, рече Иванов.
Како врховен командант, Иванов се осврна на ангажманот на припадниците на македонската армија во меѓународните мировни мисии во светот, истакнувајќи дека една до стратешките цели на земјата членство во НАТО.
„Остануваме посветени на патот кон Европската унија. Сите знаеме дека сме блокирани од нашиот јужен сосед, кој има проблем со нашиот идентитет. Веќе 23 години бара од нас да престанеме да бидеме она што сме, да го погазиме заветот што ни го оставиле нашите предци”, истакна Иванов.
Претседателскиот кандидат на ВМРО-ДПМНЕ и пред кумановчани дека нема да прифати прифатам промена на Уставот, со цел промена на уставното име.
„Нема да прифатам идеи или предлози што би ги загрозиле македонскиот национален идентитет, посебноста на македонската нација, македонскиот јазик и македонскиот модел на соживот. Што и да прави, нашиот јужен сосед не може да не спречи да ја градиме Европа во Македонија. Да ја градиме со спроведување на европските реформи, европските стандарди и европските критериуми”, рече Иванов додавајќи дека за успесите што ги постигнува Македонија се и петте позитивни извештаи и петте препораки за преговори за членство на Македонија во Европската унија.
„Како претседател го бранев и ќе го бранам државното единство на Република Македонија. Претседател сум на сите граѓани, независно од етничката, верската или која било друга припадност. Тоа го правев и ќе продолжам да го правам. Затоа наоѓав време да одам кај православните христијани, кај католиците и кај протестантите. Одев и во џамии, одев и на ифтари, одев и на Ханука кај Евреите. Тоа беше моето мото, еден за сите. Бев присутен кај сите. Затоа што има многу религии, но има една вера – верата во Бога”, порача Иванов