„Очекуваме на 27 април, двојна победа. Очекуваме уште помасовно да излезат граѓаните и да гласаат. Да гласаат за политиките кои ги поддржуваат. Да гласаат за себе, да гласаат за своите семејства, да гласаат за иднината на Македонија“, рече во својот говор во општина Центар, кандидатот на ВМРО-ДПМНЕ за Претседател на Република Македонија, г. Ѓорге Иванов.
– Со досегашното работење докажавме дека веруваме во Македонија! Затоа соработуваме. Сите институции во државата да соработуваат и да покажуваат заедништво. Да покажуваат соработка во интерес на сите граѓани на Република Македонија. Тоа го препознаа граѓаните.
– Веруваме во Македонија затоа што го гледаме оптимизмот насекаде низ државата. Насекаде гледаме дека граѓаните го поддржуваат и го поздравуваат тоа што се прави. Се прават автопатишта, се градат фабрики, се отвораат нови училници, се градат нови болници. Граѓаните тоа го препознаваат и го поддржуваат.
– Тоа се постигна во услови на голема светска економска криза, голема европска должничка криза, во такви услови кога многу посилни економии од Македонија, не можеа да се справат со тие предизвици, Македонија покажа дека може економски да успее. Затоа во Македонија доаѓаат странски инвестиции, затоа во Македонија расте производството и расте извозот. Но растат и платите, растат и пензиите, растат и субвенциите за земјоделците, и стипендиите за студентите. Кога расте економијата, се расте во државата. Тоа го препознаа граѓаните и на тоа даваат поддршка.
– Со секоја нова инвестиција во Македонија, со секое ново пријателство што го стекнуваме, со секој успех што го постигнуваме, успева и Македонија. Успеваат нашите спортисти, успеваат и нашите уметници, успеваат нашите пејачи, успеваат и нашите научници. Тоа е новиот лик на Македонија. Македонија која успева. Македонија во која секој може да успее.
Македонија е и земја на различитости. Земја во која се почитуваат различните етнички групи, различните религии. Така било одамнина, така треба и да остане. Тоа е заветот од нашите предци, да се почитуваме меѓу себе. Да укажуваме чест и достоинство, на сето она што ни е наследено и што не одржало на овие сурови балкански простори. Затоа мораме да покажуваме заедништво, сите етнички групи, сите религиозни групи. Тоа заедништво да е одраз на Македонија, затоа што сите сме Македонија.
– Покажавме дека Македонија се сака со искреност. Затоа не ветуваме ништо што не може да го оствариме. Затоа во нашите програми, и мојата програма и програмата на ВМРО-ДПМНЕ секој пат е поставено она што може да се реализира. За да може да поднесеме отчет. Тоа вие го препознавате, и тоа вие го наградувате на изборите. Затоа и јас како Претседател, иако велат според Уставот немам ингеренции за економијата, економијата ја ставив за овие пет години на ист ранг како и безбедноста на државата, меѓународната политика и внатрешната политика. Сакаме сите да ни успее економијата. Македонија да биде економски силна и развиена држава. Да биде и безбедна држава, сигурна држава, и меѓународно признаена и почитувана. Но затоа, мора да биде економски силна и развиена.
– Се што правев овие пет години беше да создадеме услови за нашата економија. Да создадеме можности за нашата економија, да отвораме нови пазари за македонските производи. И затоа расте извозот од Македонија.
– Доколку ја добијам вашата доверба, и следните пет години ќе работам со ист интензитет, за промовирање на сето она што е најдобро од Македонија. Промовирање на она по што не препознаваат и по што не почитуваат. Затоа што станува збор за наша држава. Држава за која гинеле многу наши предци. Тие ни оставиле завет да ја чуваме Македонија. И затоа мотото на оваа кампања е дека „Државата ни е пред се“, „Македонија ни е пред се“.
Но мора да мислиме и за сиромашните, за старите, за болните, за лицата со посебни потреби. На тоа го посветив и дел од мојот мандат. Мојот Кабинет беше отворен за сите оние што имаат потреба, да кажат што ги тишти, и со што се соочуваат во својот живот. И затоа помагавме. Помагавме на сите ранливи групи и граѓани. Треба да сме солидарна земја, како што отсекогаш сме биле. Да им помогнеме на тие што им е потребна помош, истакна Иванов.