“Кога еднаш ќе се дојде во Гостивар, се доаѓа повторно и повторно. Се доаѓа, затоа што Гостивар е град на достоинство. Доаѓав неколку пати на средби со граѓаните на Гостивар.
Сакам прво да ви се заблагодарам што пред 5 години, ми дадовте многу повеќе гласови мене, отколку на кандидатот на опозицијата. Ви благодарам. Се надевам дека и овој пат истото ќе го направиме” рече претседателскиот кандидат на ВМРО-ДПМНЕ на митинг во Гостивар
Иванов рече дека “насекаде во Македонија граѓаните имаат исти потреби. Од Куманово до Гевгелија, од Струга до Берово, и во Скопје и во Гостивар, граѓаните сакаат подобар живот. Граѓаните сакаат иднина за своите деца. Пред се сакаат вработување за младите”.
Иванов потсети на својот став дека “за овие пет години во Македонија покажавме како се работи како тим. Како се гради државно единство, и како сите институции соработуваат меѓу себе. И затоа, сите резултати се видливи. Јас како Претседател и Премиерот Груевски и министрите, секогаш бевме посветени на една цел, да го подобриме животот во Македонија. Затоа се направени реформи во секоја област. Секаде се менува животот во Македонија. Има уште многу работа, многу треба да се работи. Но затоа имаме чист образ, повторно да дојдеме и да ја побараме вашата доверба, за да работиме како тим за Македонија”.
Според Иванов направен е успех на сите полиња: “затоа ќе продолжиме со исто темпо и со ист интензитет. На сите во Македонија да им помогнеме, за земјоделците да имаат уште повеќе субвенции и за пензионерите да имаат редовни и повисоки пензии. За студентите да има стипендии, за учениците да има бесплатни учебници. На секого во Македонија да му се помогне”.
Иванов и одговори и на опозицијата: “одредени политичари зборуваат дека не сум бил претседател на сите граѓани на Македонија. Поминав илјадници километри низ Македонија, во текот на целиот мандат, во најразлични етнички средини и секаде бев пречекан срдечно и домаќински. Така и возвраќав. На секој што бил во мојот Кабинет сум посветил внимание, без разлика од кое место доаѓа или на која заедница припаѓа. Тоа е вистината. Бев и останав еден за сите. И покрај обидите на таквите политичари да спечалат ситни политички поени, граѓаните покажуваат дека се помудри. Граѓаните препознаваат што е дневна политика, а што се долгорочни интереси и соживот во Македонија”.
Иванов рече дека Гостивар е пример за меѓуетничкиот и меѓурелигискиот соживот во Македонија. “Ви честитам за тоа.”
На крајот Иванов вети дека, доколку ја добие довербата, “младите повторно ќе бидат на мојата агенда,највисоко застапени. Тие млади бизнисмени, претприемачи, ќе бидат во секоја делегација каде што ќе одам да обезбедувам политичка поддршка, за проектите што носат благосостојба во Македонија. За проектите кои Владата ги спроведува, со цел нови инвестиции, нови инвеститори, отворање на нови работни места. По тоа се мери успехот на секој политичар, како во светот, така и во Македонија. Верувам во младите и затоа верувам во нивната доверба”, рече Иванов во Гостивар.