Македонија е веќе препознатлива во светот на инвеститорите. Во Македонија се отвораат слободни економски зони. Се создаваат услови за бизнис, за странски инвестиции. Тоа се успешни политики на Македонија, рече вечерва на митингот во скопската општина Карпош, претседателскиот кандидат на ВМРО-ДПМНЕ, Ѓорѓе Иванов.
– Македонија денес е почитувана членка на меѓународната заедница. Пресудата на Меѓународниот суд во Хаг го потврди тоа што го водиме како политика на Република Македонија. Покажа дека водиме исправна политика. Затоа Македонија е целосно подготвена да биде членка на НАТО и членка на Европската унија. Петте позитивни извештаи, петте препораки, за почеток на преговорите, кажуваат дека работевме вредно, дека работевме да се остварат стратешките цели на Република Македонија. Успеавме да обезбедиме и визна либерализација за нашите граѓани. Успеавме да ги зацврстиме стратешките партнерства, но и да создаваме нови.
– Да обезбедиме нови пазари за македонските производи. Нови можности за македонските компании. Успеавме да започнеме со изградба на стратешка инфраструктура. Автопатишта се градат низ Македонија. Се модернизира пругата. Во Македонија се инвестира за иднината на Македонија. За да привлечеме што повеќе странски инвестиции, да овозможиме домашните инвеститори да вложуваат и да отвораат нови работни места.
– И во услови на голема економска криза, светска криза, сето тоа е постигнато. Под такви услови Македонија покажува дека може да создава економија која има раст. А кога расте економијата, се расте во државата. Растат и пензиите, растат и субвенциите, растат и стипендиите, но растат и платите на вработените. Токму тоа го препознаа граѓаните на 13 април. Одговорот го дадоа граѓаните. Има многу уште да се работи. Многу зафати се пред нас. Многу предизвици стојат пред нас. Но кога сме заедно, кога соработуваме, кога сме единствени, тогаш и другите не почитуваат. Така се гради Македонија. Се гради Македонија со соработка. Секоја соработка носи успех. И затоа мора сите институции во државата да соработуваат.
– На 27 април, ги имаме едни од најважните избори. Најважните избори за Република Македонија. Од тие избори ќе зависи како ќе изгледа Македонија во иднина. Од тие избори ќе зависи каква Македонија ќе оставиме на нашите деца, рече меѓудругото Иванов.