Претседателот на Република Македонија, Ѓорге Иванов во своето обраќање пред јавноста рече дека одлучил да не потпише указот на Законот за јазици и дека образложението го доставил до Собранието. Иванов ги повика пратениците внимателно да ги разгледаат неговите забелешки.
-На 11 јануари беше изгласан Законот за употреба на јазиците без јавна расправа и без опозицијата. Укажав дека не е добро да се отвараат веќе апсолвирани прашања. Овој закон е донесен со европско знаменце, без да постои европска директива. Македонија ќе стане единствена земја која сама си поставува услови за членство во ЕУ кои никој не ги бара. Со донесувањето на Законот за јазици, ние донесуваме неправеден и репресивен закон со кои се фаворизира албанскиот јазик. Имајќи ги предвид моите овластувања и повикувајќи се на член 75 од Уставот на Република Македонија, одлучив да не го потпишам указот за прогласување на Законот за јазици — рече во своето обраќање Иванов.
Тој додаде дека испратил писмо до Собранието во кое има детално образложение и ги повика пратениците внимателно да ги разгледаат неговите забелешки.
Откако претседателот Ѓорѓе Иванов одби да го потпше Законот за јазиците, Владата преку соопштение изрази жалење за неговата одлука.
– Законот ќе биде испратен на мислење во Венецијанската комисија и сите нивни забелешки ќе бидат вградени во текстот на овој закон. Ова е гаранција дека законот не предвидува ништо спротивно од европските стандарди за употреба на јазиците на етничките заедници – пишува во владиното соопштение.
Според Владата, сите одредби во законското решение за употребата на јазиците се во согласност со Амандманот 5 од Уставот на Република Македонија.
– Мотивот за донесување на овој закон е грижата за сите граѓани во Република Македонија, во која градиме општество еднакво за сите. Тое е концепт во кој оваа влада силно верува силно и кој ќе продолжиме и понатаму да го унапредуваме – пишува во владиното соопштение.