„Ова е родниот крај на дедо Иљо Малешевски и Димитар Поп Георгиев Беровски. Водачите на две востанија за ослободување на Македонија на Разловечкото и на македонското Кресненско востание“, во започна својот говор претседателскиот кандидат на ВМРО-ДПМНЕ, Ѓорге Иванов во Берово.
– Берово е познато и по многу други нешта. Берово успева. Во Берово се создаваат услови за сите млади луѓе да останат и да живеат во Берово, да не го напуштаат како во минатото. Затоа, кога и да одам во странство, кога ќе ги видам младите иселени беровчани, им велам дојдете да видите што се прави во Берово со новиот градоначалник. Да видите кои се условите кои се создаваат. Како се планира индустриска зона, како се планира да се развива зимскиот туризам, ски патеката се отвора да се создаваат услови беровчани да живеат достоен живот. Да покажат дека може да се живее од свој труд.
– Во услови на голема економска криза од 2008 година, многу европски економии тешко се справуваа со тие предизвици. Но од 2006 година во Македонија дојде еден млад тим предводен од Никола Груевски. Се вратија наши успешни луѓе. Успешни луѓе од меѓународни институции, од меѓународни корпорации се вратија во Македонија за да и помогнат на Македонија. Дури имаме и син на иселеник кој се родил во Америка Џери Наумов, кој дојде да биде министер во Владата на Груевски. Да се привлекуваат странски инвеститори и да се дава пример дека треба успешните да се враќаат во Македонија. Затоа што Македонија расте и се развива.
– Некои зборуваат за нови лица во Македонија. Јас ќе кажам Македонија има нов лик. Македонија во која што се градат автопатишта, Македонија во која што се градат фабрики, Македонија во која што се привлекуваат странски инвестиции, кој создава производи со брендот Македонија. Тоа е успешна Македонија. Но до сето тоа да се дојде мораше да се спроведат многу реформи. Мораше многу закони да се изменат, да се носат закони. Мораше да се оди по многу дестинации во светот, да се убедуваат бизнисмените да доаѓаат и да инвестираат во Македонија. Е, тоа е новото лице на Македонија, за кое што требаше многу труд, многу посветеност, но и државно единство, со ист глас да се збори и од претседателот и од премиерот, и од министрите. Еден глас да се слуша од Македонија. Тоа е Македонија која успева. Затоа ја барам повторно довербата од Вас.
– Еднаш кажав и ќе повторам – што е наше ќе си дојде. Но ние да сме посветени, обединети и да имаме еден глас надвор од Македонија. Да имаме државно единство и сите институции заедно да работат и да функционираат за доброто на граѓаните на Македонија, рече меѓудругото Иванов пред беровчани.
Фотографии и текст од говорот испрати Центарот за комуникации на ВМРО-ДПМНЕ