Покажавте дека и во Македонија се менува политиката. Дека политиката не се вреднува само со убави зборови и празни ветувања. Покажавте дека политиката се вреднува со број на отворени работни места, со економски просперитет и успех на Македонија. Тоа е успешна политика, рече претседателскиот кандидат на ВМРО-ДПМНЕ, Ѓорги Иванов.
– За овие пет години покажавме дека институциите не само што треба туку и мора да соработуваат. Кога соработуваат институциите во Македонија имаме израз на заедништво.
– Имаме еден глас кој ја претставува Македонија низ сите институции низ светот. Кога имаме единство во државниот врв, имаме и успеси. Тогаш не почитуваат од надвор. Тогаш сите ја забележуваат разликата.
– За тоа сведочат и 5-те извештаи што ги добивме и 5-те препораки за почеток на преговори со Европската унија.
– За тоа говорат извештаите на сите светски финансиски институции кои неколку години ја рангираат Македонија како една од најповолните дестинации за отпочнување и за водење бизнис..
– За тоа, пред сè, говори и довербата што граѓаните ни ја даваат на изборите, бидејќи препознаваат разлика.
– Претседателот на Република Македонија е избран од граѓаните и тој мора да биде постојано со граѓаните.
– Така беше и во изминатите пет години. Пет години бев со моите сограѓани. Но и тие доаѓаа кај мене, во Кабинетот, да кажат што ги тишти, да кажат што мислат за клучните прашања за државата. Можам да го сослушам секој и да забележам дека се менува ставот на граѓаните во Македонија. Нашите граѓани стануваат свесни за сите проблеми и предизвици со кои се соочува Македонија и за нив имаат свој став.
– Затоа го одбравме мотото на оваа кампања да ни биде „Државата ни е пред се“, затоа што Македонија ни е пред се, а Македонија сме сите ние. Без разлика на етничка, религиозна припадност. Без разлика кој од каде потекнува. Сите ние сме Македонија.
– Видовте во изминатите пет години дека дадениот збор е моја обврска. Сето она што е во мојата програма за втор мандат се раководи токму од вашите барања, и сето она што го истакнуваа граѓаните на Република Македонија.
– Затоа почитувани граѓани, Вашиот глас за мене, вашиот глас за ВМРО-ДПМНЕ и коалицијата „За подобра Македонија“ е глас за самите вас, глас за вашите семејства, глас за вашите општини, глас за Македонија, рече Иванов од Гази Баба.