И вие гледате дека се менува политиката во Македонија. Во политиката веќе влегуваат луѓе кои знаат што сакаат. Луѓе кои довербата ја бараат со програма, но потоа даваат и отчет за таа програма, со овие зборови претседателскиот кандидат на ВМРО-ДПМНЕ го отвори својот говор во Радовиш.
– Моја цел е економски развиена Македонија, членка на Европската унија и НАТО. Македонија како напредна земјоделска земја, која ги пласира своите квалитетни производи на светските пазари. Македонија во која постои доверба меѓу институциите и граѓаните, во која се вреднува трудот на работниците и на земјоделците. Држава во која младите можат да добијат квалитетно образование, да се вработуваат, да успеват во животот, да формираат семејства и да оставаат потомство, рече Иванов.
Тој пред жителите на Радовиш порача дека успесите се постигнуваат со напорна и тимска работа, посочувајќи дека тимски, донесени се многу закони и реформи во земјата.
– Сите чувствуваат дека работите се менуваат на подобро во државата. Насекаде во Македонија се гради. Се градат автопатишта, индустриски развојни зони, фабрики и погони. Се градат училишта, болници, спортски терени. Се инвестира во земјоделството, во образованието, во спортот, во културата. И секаде гледаме резултати, продолжи претседателскиот кандидат на ВМРО ДПМНЕ.
Иванов во Радовиш нагласи дека заедно со Премиерот и со кандидатите за пратеници, и повторно ја бара довербата, за да работат со истиот интензитет со кој работел во претходниот мандат.
– Јас верувам во овој тим. Но и ВМРО-ДПМНЕ и коалицијата За подобра Македонија верува во мене, потенцираше Иванов, образложувајќи дека се што досега правел било од љубов кон Македонија.