Претседателот Ѓорге Иванов, денеска го прими амбасадорот Јоханес Хајндл, личен претставник на министерот за надворешни работи на Сојузна Република Германија.
Од Кабинетот велат тие разговарале за актуелните случувања на политички план во Република Македонија и размениле информации и мислења за можностите и начините за надминување на предизвиците на политичката сцена во земјата.
Македонскиот претседател и германскиот пратеник размениле мислења и за состојбата поврзана со мигрантската и бегалската криза, како и влијанието на актуелната политичка состојба врз севкупните капацитети на државата во справување со истата.
Како што соопштуваат од Кабинетот на Иванов, двајцата соговорници се согласиле дека Република Македонија е неопходно да има функционални државни институции кои ќе можат професионално, навремено и ефикасно да одговорат во справувањето и превенцијата со заканите и во таа насока, соговорниците истакнале дека сите политички чинители треба да покажат одговорност, конструктивност и висока свест за интересите на граѓаните и на државата.
Претседателот Иванов на средбата истакнал дека како и досега, така и во иднина ќе постапува единствено според Уставот и Законите на Република Македонија и исклучиво во интерес на државата и на граѓаните на Република Македонија.