Претседателот Иванов имал средба со Миле Јанакиески, дента кога Груевски објави на Фејсбук дека е во Будимпешта, потврдија од Кабинетот на шефот на државата, но наведуваат дека на средбата не се разговарало за амнестија.
„Миле Јанакиески телефонски побара средба со Претседателот Иванов која е одржана на 13.11.2018 година, вторник во 16:00 часот во Кабинетот на Претседателот на Република Македонија. На средбата, воопшто не беа дискутирани темите амнестија, на која се повикува судот во решението за притвор, која е во надлежност на Собранието на Република Македонија, ниту пак темата аболиција“, пишува во соопштението од Кабинетот на претседателот.
Од Кабинетот, негираат дека Иванов имал средба со посредник на Јанакиевски, како што пишува во белешката од МВР , што била доставена од СЈО до Кривичниот совет со барањето да му се определи притвор на Јанакиески.
Од Кабинетот на Иванов категорично отфрлаат каква било инволвираност во врска со донесената судска одлука.
„Ја информираме јавноста дека ниту е побарана, ниту одржана средба со посредник на Миле Јанакиески, како што е наведено во службената белешка на УБК, класифицирана „строго доверливо“, а која е основ за определување на мерката притвор.
„Сметаме дека станува збор за конструкција на лаги врз основа на претпоставки со цел да се инволвира Претседателот на Република Македонија, видливо од јавно објавеното образложение на решението на Судот. Сето ова претставува груба полициска манипулација и инволвирање на полициски службеници со што се извршени кривични дела злоупотреба на службена положба и овластување, фалсификување на исправа, употреба на исправа со невистинита содржина. Останува нејасно, врз основа на што се следат активностите на претседателот Иванов и неговиот Кабинет од страна на УБК?“, пишува во соопштението од Кабинетот на Претседателот.
Иванов бара итни одговори од министерот за внатрешни работи, од директорот на УБК, од претседателот на Основниот суд Скопје 1 на дописите од Кабинетот на Претседателот на Република Македонија кои биле испратени денеска.
Во образложението од Кривичниот совет за одредувањето на 30 дена притвор за Јанакиевски пишува дека советот е уверен дека Јанакиевски ќе започне со организирање на бегство, откако му била пренесена информација дека кај Претседателот нема расположение за амнестија, што Јанакиевски го сметал за последна шанса да избегне издржување на затворска казна. СЈО побара притвор за Јанакиевски врз основа на службена белешка која ја добиле од МВР дека Јанакиевски преку посредник барал средба со Претседателот Иванов, со цел да издејствува амнестија за сите лица против кои се водат судски процеси од страна на СЈО. На средбата, посредникот го замолил Иванов да ги амнестира сите лица од најголемата опозициска партија за кои се водат судски спорови, меѓу кои и Миле Јанакиески, кој бил иницијатор на средбата. Иванов бил категорично против предлогот и рекол дека нема намера да амнестира.