Жалам што не успеа последниот обид за излез од ситуацијата, на ден пред завршувањето на рокот за поднесување листи за локалните избори, кој подразбираше вклучување на поголем пакет прашања што би се разгледувале од експертската комисија.
Комисија која требаше да даде и препораки за подобрување на системот, препораки чие натамошно имплементирање ќе гарантираше дека вакви нешта нема да се повторат, истакнува претседателот Ѓорге Иванов во интервју за мкд.мк
Претседателот открива дека имал уште најмалку една средба со лидерите на ВМРО-ДПМНЕ и на СДСМ, Никола Груевски и Бранко Црвенковски, и неколку телефонски разговори, кои за жал завршиле неуспешно.
Според претседателот Иванов, овие случувања најмногу ѝ одат во прилог на Грција, која со ова добива уште еден аргумент во блокирањето на македонската интеграција во ЕУ.
„Крупните работи во политиката некогаш се случуваат зад сцената. Ако нема официјални најави за средби, тоа не значи дека тие и не се одржуваат. Целта е од тие средби да има резултат, успех, поместување и приближување на позициите“, вели претседателот Иванов, в интервју за порталот mkd.mk.
-Сепак, факт е дека процесот во голем дел зависи од самите нас. Сега е моментот кога треба да се покаже политичка волја, зрелост и доблест за демократски, а не за девијантен начин на дејствување. Сега е моментот да се види кој на што му е посветен. Дали на личниот, на партискиот или на државниот интерес“, изјави претседателот Иванов.
Во меѓувреме експресна реакција од СДСМ. Според најголемата опозициска партија, „Иванов да бил вистински претседател на државата ќе реагирал веднаш после случувањата на 24 декември и на суспендирањето на демократијата и рушењето на правната држава“.
„Затоа, со неговото денешно интервју тој уште еднаш потврди дека е обичен статив и марионета на Никола Груевски“, се вели во соопштението.