– Со голема жалост ја примив веста за смртта на големиот борец за човекови права, борец против злото на апертхејдот, поранешниот претседател Нелсон Мандела… Во период на неслобода и неправда, тој беше инспирација не само за неговите сограѓани, туку и за многу слободољубиви поединци во целиот свет. Храбро, гласно и истрајно спротивставувајќи се на дискриминацијата и нетолеранцијата во својата земја, тој се стекна со голем углед и почит кај многу слободољубиви народи низ сите меридијани, вели македонскиот претседател Горѓе Иванов во писмото со сочувство по повод смртта на Мандела.
Во трајно сеќавање, како што вели Иванов, ни остануваат зборовите на Мандела: „Да се биде слободен не значи само да се отфрлат синџирите, туку и да се живее со почитување и унапредување на слободата на другите“.
– Бидете уверени дека Република Македонија и македонските граѓани целосно се препознаваат во ова сфаќање на слободата, истакнува во писмото македонскиот претседател изразувајќи сочувство до граѓаните на Јужноафриканската Република и до семејството Мандела.