Многу е тешко речиси невозможно да се коментира говор во кој нема ништо содржински и конкретно, или пак да се коментира човек Претседател на Република Македонија кој што самиот ја девалвираше функцијата Претседател на државата, вели Игор Ивановски од Социјалдемократскиот сојуз по повод годишното обраќање на претседателот на Македонија Ѓорѓе Иванов.
-Ѓорге Иванов денеска во своето обраќање де факто го завршува својот мандат онака како што го почна. Има слика нема тон. Тој свесно и по налог на неговиот шеф и патрон Никола Груевски ја девалвираше, ја маргинализираше функцијата Претседател на државата и одлучи во сите овие 5 години да биде диригиран со далечински управувач од страна на Владата на Република Македонија. И денеска, како во изминативе 5 години, Ѓорге Иванов не даде одговор на клучните прашања што ги мачат граѓаните и државата. За криминалот и корупцијата, за партизираното судство, за притисокот врз медиумите, за поделбите по сите основи во државата, изјави Ивановски.
Според пратеникот на СДСМ, најтрагично е што Претседателот воопшто не дал мислење и визија каде треба да оди Република Македонија.
„Ако веќе треба да бираме по што ќе го паметиме Ѓорге Иванов, ќе го паметиме по неговите дипломатски скандали и реторички гафови, по бунарот во Паљурци, по неговото дружење со Хунзите, по неговото намигнување на Обама, по неговото одликување на еден како што тоа го кажуваат во Европската унија, новите европски диктатори, претседателот на Унгарија Орбан. И секако, по неговата порака до граѓаните да трпат, и да ја трпат нивната мака, проблеми и сиромаштија“, потенцираше Ивановски.
Координаторот на пратеничката група на СДСМ вели, на крајот, денеска не станува збор за говор на Претседателот на Република Македонија, туку говор на лицето Ѓорге Иванов, кој за цел имал да му се додвори на неговиот шеф Никола Груевски и повторно да побара уште една кандидатура за Претседател на Република Македонија.