ИВЗ останува без ветеното земјиште за изградба на своето седиште на Кале. И покрај ветувањата од заменик-министерот за транспорт и врски, Џелал Бајрами, како што дознава Алсат-М, на ИВЗ не и било дозволено да учествува во наддавањето објавено од страна на Министерството за транспорт.
Токму земјиштето на Кале беше главна тема на состанокот од пред два месеца меѓу Бајрами и поглаварот на ИВЗ Сулејман Реџепи. Заменик-министерот тогаш побрза пред медиумите да каже дека работата со земјиштето е завршена работа.
„За време на средбата имав можност и чест да го известам поглаварот на ИВЗ дека Министерството за транспорт и врски пред два-три дена објави јавен повик за отуѓување на земјиште во близина на градот Скопје и се надеваме дека ИВЗ ќе ја подготви потребната документација за купување на ова градежно земјиште во близина на Скопската тврдина, градежно земјиште, каде што ако даде Господ, во иднина ќе се изгради новото седиште на ИВЗ“, изјави Џелал Бајрами, заменик-министер за транспорт и врски.
„Јавноста знае дека често велевме, односно имавме итно барање за седиштето да се изгради обичен исламски центар на скопското Кале каде ќе има многу објекти, меѓу нив ќе биде и седиштето и ријасетот на ИВЗ во Македонија“, изјави Сулејман Реџепи , претседател на Исламската заедница ( 22/10/2013 ).
Кој го купил земјиштето сè уште не се знае, но долгогодишното барање на ИВЗ пропадна. Инаку претходно се шпекулираше дека земјиштето на Кале ќе ù се даде на ИВЗ како надомест за откажување од барањето за изградба на Бурмали џамијата во центарот на Скопје. Од друга страна, додека Исламската заедница се соочува со тешкотии, како со денационализацијата на вакафите претворени во државна сопственост, така и со купувањето на земјиште на атрактивни локации, државно земјиште за изградба на верски објекти добија други верски заедници. И камен-темелникот на гигантскиот крст во општина Аеродром е поставен на државно земјиште.