Новиот министер за животна средина и просторно планирање Нурхан Изаири истакна дека инспекторатот врши постојан увид на тешките загадувачи во земјава, но сепак за поставувањето на еколошките стандарди ќе ги почекаат согласно Законот, односно до крајот на октомври – пролонгиран рок кој Владата им го даде на најголемите загадувачи во земјава „Макстил“ и „Југохром“.
Тој посочи дека од вчера се прават вонредни испитувања преку два мерачи кои се поставени во атарот на Железара.
Наодите од испитувањата после пет дена ќе се анализираат во акредитирана лабораторија и точно ќе се знае колкав е степенот на загадување.
Министерот Изаири, денеска имаше информативна средба и со евроамбасадорот Аиво Орав.
Изаири вели дека средбата била за меѓусебно запознавање, а за актуелната еколошка состојба во земјава воопшто не станало збор.
Во меѓувреме жителите од населбите близу Железара вчера по трет пат протестираа со цел фабриката „Макстил“ да престане со загадувањата во најбрз можен рок.
Тие не се согласуваат со одлуката на Владата за пролонгирање на рокот и следниот протест веќе го најавија за во сабота.