НОВА во повеќе дневни продолженија и со посебни тематски наслови објавува серија содржински сегменти од едукативната публикација на ЦИВИЛ – Центар за слобода „СЀ ШТО САКАВТЕ ДА ЗНАЕТЕ ЗА ИЗБОРИТЕ“ посветена на јакнење на јавната свест, едукација и мобилизација на граѓанките и граѓаните за подобрување на изборните процеси.
Едукативните текстови на авторскиот тим на Цивил се посветени на различни аспекти на изборните процеси како за организацијата на изборите, избирачката администрација, изборните материјали, избирачкиот список, гласачките ливчиња, кампањите, изборниот молк, можни нерегуларности во процесот и на повеќе други аспекти.
Серијал на НОВА: Избори 2024 – Излези и гласај!!
Политичките закани и притисоци:
Изборните процеси на површина исфрлаат дефекти на институциите, општеството и државата. Меѓу нив се и политичките закани и притисоци, преку поделби, страв и заплашување, некогаш отворено, некогаш суптилно.
Најчести жртви на заканите и политичките притисоци се граѓанките и граѓаните вработени во јавниот сектор, но не е исклучен ниту приватниот. Овие притисоци воопшто не се непознати за нашето општество, и се особено интензивирани во пресрет на изборните процеси. СМС пораки за мобилизација, списоци со „сигурни гласачи“, отпуштања, казни се само дел од низата злоупотреби преку кои се врши директна систематска политичка пропаганда.
Но, вработените во јавниот сектор не се единствените жртви на политичкиот притисок, туку на вакви притисоци се изложени и работниците во приватниот сектор, социјално ранливите категории, како и самите сопственици на приватни фирми, најчесто преку Управата за јавни приходи.
Секој обид за закана или политички притисок за време на изборните процеси мора да биде пријавен и соодветно санкциониран, само така граѓанките и граѓаните ќе се охрабрат да го остварат своето право сами да носат политички одлуки. Само на овој начин во земјата може да се спроведат слободни избори, што е предуслов за владеењето на правната држава.