НОВА во повеќе дневни продолженија и со посебни тематски наслови објавува серија содржински сегменти од едукативната публикација на ЦИВИЛ – Центар за слобода „СЀ ШТО САКАВТЕ ДА ЗНАЕТЕ ЗА ИЗБОРИТЕ“ посветена на јакнење на јавната свест, едукација и мобилизација на граѓанките и граѓаните за подобрување на изборните процеси.

Едукативните текстови на авторскиот тим на Цивил се посветени на различни аспекти на изборните процеси како за организацијата на изборите, избирачката администрација, изборните материјали, избирачкиот список, гласачките ливчиња, кампањите, изборниот молк, можни нерегуларности во процесот и на повеќе други аспекти.                                                     

Серијал на НОВА: Избори 2024 – Излези и гласај!!

Изборна Кампања:

Во Изборниот законик член 2 пишува: „Изборна кампања е јавно претставување на потврдените кандидати од надлежните изборни органи и на нивните програми во предизборниот период за одреден вид на избори“. 

Член 69-а од Законикот кампањата ја дефинира ако: „Јавно собирање и други јавни настани организирани од страна на учесникот во изборната кампања, јавно истакнување на плакати, видео презентации на јавни места, изборно медиумско и интернет претставување, дистрибуирање на печатени материјали и јавно претставување на потврдените кандидати од надлежните изборни органи и нивните програми“. 

Кампањата, согласно законот, почнува 20 дена пред првиот круг на гласањето, а во казнените одредби се предвидуваат глоби за најразлични прекршувања на одредбите за кампањата. 

Клучниот збор во дефинициите на кампањата е претставување на „потврдените“ кандидати.