Како што се ближат локалните избори, така расте и бројот на огласи за вработувања во државните тела. Најголем удел во огласите имаат оние нетипичните или привремените вработувања. Дури 11 државни тела во последниов месец побарале услуги за привремено вработени од агенциите, а 6 од објавите на Бирото за јавни набавки се и по официјалното распишување на локалните избори од страна на Собранието, на 11 Јануари.
Точно на денот на распишување на изборите, оглас објавило и Министерството за транспорт и врски кое бара 14 службеници, ден пред нив Министерството за труд и социјална политика побарало да се “поднови” со 34 вработени, а непосредно пред распишувањето и Секретаријатот за рамковен договор побарал 260 нови вработувања.
“Сите огласи и набавки прекинуваат на денот на објавување на изборите. Сите, вклучително и јавните набавки во кои се реализираат привремените вработувања. Објавувањата за услуги за привремени вработувања се, исто така, кршење на законот и антикорупциската треба да реагира”, вели деканот на правниот факултет, Борче Давитковски.
Ректоратот при универзитетот Кирил и Методиј, Министерството за финансии, Комуналец, Јавниот сервис, Факултетот за физичка култура и неготинскиот театар своите огласи за привремени вработувања ги објавиле по распишувањето на изборите. Не се знае ни колку луѓе бараат, ниту за кои позиции, ниту, пак, колкави се сумите, со оглед на тоа што огласите за овој тип на услуги, согласно новата пракса на бирото за јавни набавки се објавуваат во делот “други огласи” во чија секција нема никакви детаљи освен датумите на објави.
Сепак, според експертите, и покрај тоа што е законски дозволено, масовните вработувања неколку месеци непосредно пред изборите, се исто така показател за сериозен изборен поткуп, ако се има во предвид дека на, и онака преобемната администрација не и треба засилување.
Каква е таа итност од вработувања?
“Каква е таа итност од вработувања? Ако оние вработувања по распишувањето на избори се правно недозволени, оние непосредно пред избори се етички и морално неисправни. Очигледно, тоа е во функција на изборите. Тоа е нешто недозволиво, тоа не само што ги доведува опозициските партии и оние помалите во нерамноправна положба, туку тоа е и класичен изборен поткуп.” вели Темелко Ристевски, универзитетски професор
Бројот на вработувања, а особено оние привремените е голем во последните неколку месеци. Дури 16 општини и институции објавиле огласи за избор на агенција за привремени вработувања во месец Јануари, а од крајот на Октомври досега тоа го сториле околу 35 државни и локални институции и претрпијатија.
Општините Кавадарци, Демир Капија, Гази Баба, Бутел, Кочани, Кисела Вода, Гостивар, Виница, Охрид, Министерството за финансии, за земјоделство, салата Борис Трајковски и Собранието на РМ се меѓу институциите кои вработувале преку агенциите за привремени вработувања во последните три месеца. Рекордер во износот на сумата за овие вработени е салата Борис Трајковски, услуги платени во износ од 18 милиони денари.
“Нова” се обиде да добие одговор од повеќе институции на прашањето каква итност ги натерала да ангажираат работници на привремена работа, ако се има во предвид дека законот за државни службеници не препознава такви вработувања, или, привремени вработувања согласно законите подразбираат само сезонска работа или замена за отуство на вработени. Одговорите се уште ги чекаме.
Европската комисија во двата последни извештаи предупредува дека привремените вработувања не се во согласност со законите за државни и јавни службеници.
Антикорупциската комисија на 15 Јануари ги повика институциите веднаш да ги прекинат огласите за вработување, согласно изборните закони.
