Во недела се оддржуваат избори во БиХ, а граѓаните во Бања Лука шест месеци протестираат поради смртта на младиот Давид, за кој се сомневаат дека е убиен и дека власта сака да ги сокрие доказите. Овој нерасветлен случај ја компромитира владеачката коалиција и може да биде пресуден, Додик да ја изгуби поддршката во најголемата изборна единица
Босна и Херцеговина на изборите во недела избира членови за Претседателството на БиХ, нов состав на Парламентот, претседател на Република Српска, пратеници во Парламентот на Федерацијата БиХ и Народното собрание на РС, како и за пратеници во собранијата на десет кантони во федерацијата.
Ова се осми избори во Босна и Херцеговина и како и претходните, се случуваат во атмосфера на голема национална и етничка поделба.
Тензиите меѓу двата спротивставени табора во РС пред изборите дојдоа до кулминација. На едната страна е актуелната владејачка коалиција, на чело со Сојузот на независни социјалдемократи (СНСД), засилени со Демократскиот народен сојуз, Социјалистичката партија и Обединета Српска.
На другата се Сојузот за победа, во кој се Српската демократска партија, Партијата на демократскиот прогрес, Народното демократско движење и други помали политички партии. Битката е меѓу Жељко Цвијановиќ од СНСД или Вукота Говедарица од СП, за тоа кој ќе ја добие довербата на граѓаните во РС за претседателски кандидат. Победата на Говедарица ќе значи смена на власта на блокот предводен од Милорад Додик, по цели 12 години.
Според медимите во оваа држава, разликата меѓу претседателскиот кандидат на СНСД и на СП е мала, а гласовите на независните кои се проценуваат на 50 отсто од изборното гласачко тело може да бидат пресудни.
Но, она што може да биде одлучувачки фактор се и протестите на граѓаните во Бања Лука, кои шест месеци бараат „Правда за Давид“, заради убиството на 21-годишното момче Давид Драгичевиќ. Родителите на Давид тврдат дека нивниот син е убиен од полицијата и дека во случајот се вмешани и високи функционери.
Тие тврдат дека власта се обидува да ги сокрие доказите за убиството. Со нив секој ден во центарот на Бања Лука се стотици граѓани кои бараат одговор на прашањето: Кој го уби Давид Драгичевиќ?
Случајот со младиот Давид ја компромитира владејачката коалиција предводена од Додик и се поизвесно е дека ја губи поддршкна во Бања Лука, која е всушност е најголема изборна единица во РС. Сојузот за победа застана зад барањата на семејството Драгичевиќ, што уште повеќе ја зоврива атмосферата пред избори.