Службата за општи и заеднички работи на Владата го избрала идејното архитектонско решение за изградба на Стара учителска школа која треба да се гради во општината Центар, пишува порталот „Билд“. Како што беше најавено, Старата учителска школа треба да се изгради во барок.
На распишаниот конкурс биле поднесени само три авторски труда, од кои два се откупени. Првиот откуп во висина од 350.000 денари е доделен за изработено решение на авторот Петар Стошиќ, додека вториот откуп од 250.000 денари го добила авторката Калина Герасимова.
Објектот би требало да има образовна намена, при што во него би се сместиле Факултетот за ликовни уметности при УКИМ и Ликовната академија од штипскиот Универзитет „Гоце Делчев“.
Единствената маркичка за изградба на нов објект е просторот на кој во моментов се наоѓаат бараките на општинската администрација од Центар. Земјиштето е со намена за изградба на објект за државни институции и органи на локалната самоуправа.
Конкурсот за избор на идејно решение за планираната Стара учителска школа беше распишан кон крајот на септември 2016 година.
„Ќе се доизградат новите објекти за потребите на Факултет за информатички науки и компјутерско инженерство и Факултетот за физичка култура, ќе изградиме нови современи објекти за Универзитет „Дамјан Груев“ и посебен за неговиот медицински факултет како и нов објект за Универзитет „Мајка Тереза“ и повторно ќе ја изградиме старата учителска школа за потребите на високото образование“, најави во ноември Груевски.