Парламентарното собрание на Советот на Европа одлучи да го продолжи пост-мониторинг дијалогот со Бугарија, но притоа од текстот на резолуцијата го избриша македонското малцинство.
Како што јавува Дојче Веле, италијанскиот парламентарец, Лука Волонте, во својот извештај заклучи дека пост-мониторинг дијалогот со Бугарија треба да продолжи, за потоа во дебатата да предложи негово укинување, на што се спротистави Комисијата за следење на обврските на земјите членки.
На подигањето на мониторингот се спротивставија и дел од пратениците од бугарската делегација од редовите на опозицијата и од партијата на турското малцинство. Со амандманското надгласување со само два гласа повеќе, одлучено е да продолжи следењето на Бугарија од страна на паневропската асамблеја.
Во усвоената резолуција, Парламентарното Собрание на Советот на Европа (ПССЕ) изрази загриженост поради порастот на националистичката идеологија и акти и од непријателската клима против малцинствата.
ПССЕ, меѓутоа, од Резолуцијата ги избриша македонското малцинство и Помаците. Во предложениот текст на резолуцијата беше побарана посебна грижа за македонското малцинство и Помаците, како две непризнати малцинства. Бришењето на македонското малцинство од резолуцијата се случи преку амандман поднесен од група парламентарци, а пред ПССЕ предлогот го бранеше бугарскиот парламентарец Лачезар Тошев.
Бугарскиот парламентарец смета дека отстранувањето на македонското малцинство и на Помаците од текстот на резолуцијата е „подобра формула за да им се даде саканата заштита од страна на Советот на Европа“ и со тоа се „избегнува отворањето на Пандорината кутија со специфично назначување на одредени малцинства и групи“.
Македонските парламентарци Александар Николоски и Ермира Мехмети Деваја гласаа против амандманот на Тошев и против целиот текст на Резолуцијата.