Изчезнаа телата на двајцата мигранти кои на 25 јуни годинава загинаа во сообраќајна несреќа на магистралниот пат Радовиш-Штип во близина на рудникот Бучим.
Повеќе од два месеца никој не знае каде се телата на загинатите момчиња кои го изгубија животот кога товарно возило марка „ивеко“ во кое се превезувале мигрантите удрило во ограда од мост при што уште 17 мигранти беа повредени, а возачот избега од местото на несреќата.
Во невладината организација Легис велат дека не можат да ги најдат телата и да ги погребаат по муслиманските обичаи како што барале нивните семејства.
„Не знаеме каде се телата , тогаш од верската заедница рекоа дека ќе ги погребаат во Штип. Ги прашуваме оџите дали ги викнале, нема такво нешто. Ги бараме за да бидат погребани според муслиманските обичаи бидејќи тоа е според основните човекови права, тоа им следува. Се обидуваме во институциите да дознаеме каде се, но никој не знае да кажа каде се телата“, изјави Мерсиха Смаиловиќ од Легис.
Станува збор за двајца млади луѓе од кои едниот е Сакир Ахмед од Бангладеш, роден 1.01. 1989 година, а идентитетот на вториот кој е од Шри Ланка, не го знаат.
Во Институтот за Судска медицина за НОВА потврдија дека обдукција на двајцата загинати била направена на 26 јуни, еден ден по несреќата, но велат дека телата не се кај нив и не знаат каде се.
Директорот Александар Станков вели дека по обдукцијата телата се праќаат во АД Бутел и ако не се појави никој да ги побара, тие ги закопуваат.
“Телата се обдуцирани кај нас, земена е ДНК по што се заведени како НН, односно непознати лица. Ова е направено така бидејќи од МВР не добивме службена белешка дека се идентификувани“, изјави Станков за НОВА.
Од друга страна во Легис велат дека Јавен обвинител излегол на местото на несреќата и ги има податоците од загинатите. Од Легис велат дека личните документи им биле во џебовите и по идентификацијата биле предадени на нивните роднини кои биле тогаш тука. Зошто се заведени како непознати лица, не им е јасно.
Од Судска медицина велат доколку ги пронајдат телата или пак бидат есхумирани, роднините нивниот идентитет треба да го докажат со ДНК анализа, односно да достават и тие примероци за анализа.
НОВА неколку пати се обиде да ги добие надлежните во АД Бутел каде детално беше објаснето зошто ги бараме, но и покрај настојувањето да стапиме во контакт со директорот или раководителката, оставивме и контакт телефон, од таму немаше никаков одговор.
Останува да се види што ќе одговорат надлежните од АД Бутел во наредните денови и дали се таму телата на двајцата загинати мигранти.