Новата албанска Влада на социјалистот Еди Рама денеска ја доби довербата од мнозинството пратеници. По долгата 20-часовна дебата од присутните 137 пратеници, „за“ новиот владин кабинет гласаа 82 пратеника, додека 55 беа против.
Во новиот кабинет на албанската влада седат 20 министри, од кои шест се жени.
Во новата влада е вклучен и новинарот од Македонија Назим Рашиди. Рашиди, како што пишува „Утрински весник“, ја прифатил позицијата на советник за регионална и меѓународна култура при Министерството за култура. На тој начин ќе биде еден од најблиските соработници на албанската министерка за култура, Мирела Кумбаро, објаснува весникот.
Рашиди е прв Албанец од Македонија кој имал ваква висока позиција во албанската Влада. Покрај него, во новиот владин состав ќе има и советник од Косово.
Претседателот на Демократската унија за интеграција Али Ахмети упати честитка до Еди Рама во која тој најнапред ги поздрави добро спроведените избори кои, како што истакна, ќе и овозможат на Албанија да добие статус на земја кандидат за членство во Европската унија на декемврискиот самит.