Со 92 гласа „за“, без воздржани и против, Собранието попладнево во рамки на осмата седница ја донесе завршната сметка на Буџетот за 2016 година, што практично претставува еден вид попис на парите потрошени од Буџетот предвиден за претходната година.
Министерот за финансии Драган Тевдовски во образложението наведе дека вкупните приходи на Буџетот се реализирани во износ од 169,3 милијарди денари, а расходите во износ од 185,4 милијарди денари, поради што буџетскиот дефицит изнесува 16,1 милијарда денари, односно 2,7 проценти од БДП.
– Треба да учиме од грешките од минатото и да не дозволиме тие да се повторат, рече Тевдовски, кој вети дека на крајот на мандатот Македонија ќе има завршна сметка како Данска.
Пратениците од ВМРО-ДПМНЕ за време на денешната расправа во реплики и контра-реплики посочија дека претходната Влада трошела домаќински, зголемила плати, пензии и социјалната помош, а редовно биле исплатувани и субвенциите.
Ставот на пратениците од СДСМ, искажан вчера е дека претходната влада предводена од ВМРО-ДПМНЕ не водела сметка за приватниот сектор и за подобар и подостоинствен живот на граѓаните.