Регулаторната комисија за енергетика по втор пат неделава одржа седница на која носи одлука за промена на цените на горивата. Според последните пресметки регулаторите се одлучија за повторно зголемување кое граѓаните дополнително ќе ги удри по џебот, во однос на бензините за половина денар за литар но за еуродизелот ќе мора да одвојуваат и по три денари повеќе.
Регулаторната комисија информира дека денешната промена на Одлуката од 5 април 2021 година за највисоките малопродажни цени на нафтените деривати и горива за транспорт, е донесена согласно измените на Законот за акцизите што го донесе Собранието.
Со најновите измени дојде до изедначување на цените на дизелот и екстра лесното масло.
Цената на екстра лесното масло за домаќинство ЕЛ-1 се зголемува за 13,50 денари за литар, а на мазутот М-1 опстанува непроменета.
Согласно оваа одлука од вечерва на полноќ максималната цена на еуросуперот БС-95 ќе изнесува 67,50 денари за литар, на еуросуперот БС-98 69,50 денари за литар, на дизелот и на екстра лесното масло по 58,00 денари за литар, а на мазутот 34,779 денари за килограм.